4
10 aprel 2026-cı il tarixində Lənkəran şəhər Heydər Əliyev Mərkəzinin təşkilatçılığı ilə görkəmli ədəbiyyatşünas alim, şair və Əməkdar müəllim Mirhaşım Talışlının anadan olmasının 100 illiyinə həsr olunmuş yubiley tədbiri keçirilib.
Tədbiri giriş sözü ilə açan Lənkəran Şəhər Heydər Əliyev mərkəzinin direktoru Reyhanə Sadıxova Mirhaşım Talışlının zəngin həyat yolu, pedaqoji fəaliyyəti və Lənkəranın ədəbi mühitinə verdiyi dəyərli töhfələrdən bəhs edib.
Ardınca alimin həyat və yaradıcılığını, elmi axtarışlarını və pedaqoji fəaliyyətini əks etdirən sənədli film nümayiş olunub.
Daha sonra çıxış edənlər Mirhaşım Talışlı ilə bağlı xatirələrini bölüşərək onun Azərbaycan ədəbiyyatına və elm sahəsinə verdiyi töhfələri xüsusi vurğulayıblar.
Yubiley gecəsi musiqi nömrələri və bədii kompozisiyalarla davam edib. Mirhaşım Talışlının qələmə aldığı lirik şeirlər səsləndirilib, qəzəlləri isə Lənkəran Dövlət Dram Teatrının aktyoru Allahverən Babayev və aktrisa Aynur Əhmədovanın ifasında təqdim olunub.
Tədbirdə həmçinin Lənkəran şəhər 5 saylı körpələr evi və uşaq bağçasının fidanları, “Babalar” folklor qrupu və “Ay lolo” rəqs qrupu rəngarəng çıxışları ilə iştirak edərək gecəyə xüsusi ab-hava qatıb.
Sonda tədbir xatirə şəkillərinin çəkilməsi ilə yekunlaşıb.
AMİDTV.AZ
Allahverən Pərvizoğlu
