17
Aprelin 4-də Cəmşid Naxçıvanski adına Hərbi Liseydə və Azərbaycan Hərb Tarixi Muzeyində aprel döyüşlərinin 9-cu ildönümünə həsr olunmuş anım tədbirləri keçirilib.
Tədbirlərdə dövlət qurumlarının nümayəndələri, hərbi qulluqçular, Aprel döyüşlərində sağlamlıqlarını itirən şəxslər, ictimaiyyət və media nümayəndələri iştirak ediblər.
Tədbirlər xalqımızın Ümummilli Lideri Heydər Əliyevin, ölkəmizin müstəqilliyi, ərazi bütövlüyü və suverenliyi uğrunda şəhid olanların xatirəsinin bir dəqiqəlik sükutla yad edilməsi və Azərbaycan Respublikasının Dövlət Himninin səsləndirilməsi ilə başlayıb.
Çıxış edənlər Aprel döyüşlərinin hərbi-siyasi və strateji əhəmiyyətindən danışıb, qazanılan qələbənin 2020-ci ildəki böyük Zəfərə aparan yolun əsas başlanğıcı olduğunu qeyd ediblər. Bu döyüşlərin Azərbaycan Ordusunun gücünü və xalqın dəstəyini bütün dünyaya nümayiş etdirdiyi diqqətə çatdırılıb. Döyüşlərdə Azərbaycan Ordusunun şücaəti, hərbi qulluqçularımızın fədakarlığı xüsusi qeyd olunub.
Bildirilib ki, 2016-cı ilin aprelində Azərbaycan Ordusu düşmən təxribatının qarşısını alaraq, işğal altındakı mühüm yüksəklikləri azad edib və bununla da xalqımızın torpaqlarımızın tam azad ediləcəyinə olan inamını daha da artırıb.
Şəhidlərimizin xatirələrinin daim xalqımızın yaddaşında qalacağı xüsusi əminliklə qeyd olunub. Tədbirlərin bədii hissələrində vətənpərvərlik ruhunda musiqilər, şeirlər səsləndirilib.
Aprel döyüşlərinin 9-cu ildönümü ərəfəsində şəhidlərimizin məzarları ziyarət olunub, üzərlərinə gül dəstələri düzülərək xatirələri ehtiramla yad edilib, ruhlarına dualar oxunub.
AMIDTV.AZ
