Vətən uğrunda əbədi yaşar qəhrəman Hüseynov Zaur Emin oğlu
Azərbaycanın müasir tarixində igid oğullarımızın qəhrəmanlığı ilə yazılmış saysız-hesabsız şanlı səhifələr var. Bu səhifələrdən biri də Ağısu rayonunun İlxıçı kəndində doğulub, döyüş meydanlarında igidlik göstərərək itkin düşən Hüseynov Zaur Emin oğlunun həyat yoludur.
Uşaqlıq illəri və ailəsi
Zaur Emin oğlu Hüseynov 6 yanvar 1975-ci ildə Ağısu rayonunun İlxıçı kəndində dünyaya göz açıb. Dörd qardaş və beş bacının son beşiyi idi. Böyük ailənin ən kiçiyi olmaqla yanaşı, həm də hamının sevimlisi olub. Uşaqlıqdan mehribanlığı, sadəliyi və təmiz ürəyi ilə seçilən Zaur, kənd məktəbində təhsil alarkən də müəllimlərinin diqqətini zəhmətsevərliyi ilə qazanıb.
Hərbi xidmət yolu
Orta təhsilini başa vurduqdan sonra hərbi xidmətə yollanan Zaur, orduda intizamlılığı və vətənpərvərliyi ilə seçilib. Müddətli xidmətini başa çatdırdıqdan sonra vətən torpaqlarının ağır günlər yaşadığını görərək, evinə dönmək əvəzinə könüllü olaraq hərbi xidmətdə qalmağı seçib.Onun bu seçimi sadə bir qərar deyildi – bu, Vətən sevgisinin ən saf təzahürü idi.
Döyüşlərdə qəhrəmanlığı
Zaur Hüseynov 1990-cı illərin ən gərgin döyüş bölgələrində – Ağdam və Füzuli istiqamətlərində vuruşub. O, gənc yaşına baxmayaraq, cəsurluğu ilə həm komandirlərinin, həm də silahdaşlarının dərin hörmətini qazanıb. Onun döyüşlərdə göstərdiyi igidlik bir çox gənc əsgərə nümunə olub.Son döyüş – Mərzili kəndi1993-cü il 26 dekabr tarixində Ağdam rayonunun Mərzili kəndi uğrunda gedən qanlı döyüşlərdə Zaur Hüseynov silahdaşları – Şərifov İlham Sahib oğlu, Sadıqov Şirməmməd Nuru oğlu və Əliyev Ruslan Ağadadaş oğlu ilə birlikdə mühasirəyə düşüb.Həmin gündən sonra nə Zaurdan, nə də döyüş yoldaşlarından bir xəbər alınıb. Onların taleyi illərdir ki, vətən uğrunda canından keçən minlərlə igidimizin naməlum sirli dastanına çevrilib.
Xalq yaddaşında yaşayan igid
Zaur Hüseynovun adı doğma İlxıçı kəndində daim ehtiramla anılır. Onun qəhrəmanlığı ailəsinin, qohumlarının və bütün kənd sakinlərinin qəlbində bir fəxarət mənbəyidir. Hər il torpaq uğrunda canından keçən bütün şəhidlərimiz kimi, Zaurun da adı hörmətlə yad edilir.Onun həyat yolu bizə bir daha göstərir ki, vətən sevgisi hər kəsin ürəyində yaşasa da, onu canı ilə təsdiqləyənlər əbədi qəhrəman olur.
Əbədiyaşar xatirə
Zaur Hüseynovun taleyi itkinliklə nəticələnsə də, onun göstərdiyi qəhrəmanlıq əbədi olaraq xalqımızın yaddaşında yaşayır.Bu gün azad Azərbaycan torpaqları üzərində dalğalanan üçrəngli bayraq, Zaur kimi igidlərin qanı bahasına ucalıb.Onun xatirəsi qarşısında baş əyir, ruhuna rəhmət diləyirik.
AMİDTV.AZ
Sona Qubeysqızı
