Krakov Azərbaycan Evində “Polşada təhsil, yaşam və karyera perspektivləri” adlı seminar keçirilib

Polşanın Krakov şəhərində yerləşən Azərbaycan Evində “Xarıbülbül” Dünya Azərbaycanlıları Mədəniyyət Assosiasiyasının, Qərbi Azərbaycanlıların Mədəni İrs Hüquq və Azadlıqlarının Müdafiəsi Assosiasiyasının birgə təşkilatçılığı ilə “Polşada təhsil, yaşam və karyera perspektivləri” adlı seminar keçirilib.

Polşanın “Polcare Academy” şirkətinin konsultant heyəti və bu ölkənin aparıcı şirkətlərində müxtəlif vəzifələrdə çalışan həmyerlilərimiz öz iş təcrübələrini iştirakçılarla bölüşərək, Polşanın İT və maliyyə bazarı haqqında təqdimatla çıxış ediblər.

Seminar müddətində Polşada təhsil, həyat tərzi, tələb olunan ixtisaslar, eləcə də orada leqal olaraq yaşamaq və işləmək haqqında geniş məlumatlar verilib. Həmçinin uğurlu CV hazırlanma qaydası, iş müsahibələri zamanı verilən suallar və s. mövzular ətrafında fikir mübadiləsi aparılıb. Tədbirin sonunda iştirakçıların sualları cavablandırılıb.

Qeyd edək ki, Krakov Azərbaycan Evində Polşada yaşayan azərbaycanlıların şəbəkələşməsi, eləcə də Azərbaycan həqiqətlərinin və mədəniyyətinin təbliği istiqamətində mütəmadi tədbirlər təşkil olunur.

AMİDTV.AZ