31 Mart – Azərbaycanlıların Soyqırımı: Tarixin Qanlı və Unudulmayan Səhifəsi
31 mart tarixi Azərbaycan xalqının yaddaşına silinməz iz salmış faciəli günlərdən biridir. Bu gün 31 Mart Soyqırımı qurbanlarının xatirəsi ehtiramla yad edilir, onların ruhuna dualar oxunur. Bu tarix təkcə bir gün deyil, bütövlükdə xalqımızın üzləşdiyi böyük bir faciənin, insanlıq əleyhinə törədilmiş cinayətlərin simvoludur.
1918-ci ilin mart-aprel aylarında baş verən hadisələr Azərbaycan tarixinin ən qanlı səhifələrindən biri kimi yadda qalmışdır. Həmin dövrdə Bakı şəhərində və ölkənin müxtəlif bölgələrində – Şamaxı, Quba, Qarabağ, Zəngəzur, Lənkəran və digər ərazilərdə dinc azərbaycanlı əhaliyə qarşı genişmiqyaslı qırğınlar törədilmişdir. Bu hadisələr təsadüfi deyil, planlı şəkildə həyata keçirilmiş və milli zəmində nifrət siyasətinin nəticəsi olmuşdur.
Minlərlə insan – qadınlar, uşaqlar, qocalar amansızcasına qətlə yetirilmiş, evlər yandırılmış, məscidlər və tarixi abidələr dağıdılmışdır. Şamaxıda yüzlərlə yaşayış məntəqəsi viran qoyulmuş, Qubada isə kütləvi məzarlıqlar bu gün də həmin vəhşiliklərin canlı sübutu kimi qalmaqdadır. Bu faktlar göstərir ki, məqsəd yalnız insanları məhv etmək deyil, həm də onların tarixini, mədəniyyətini və izlərini silmək olmuşdur.
Xüsusilə Quba rayonunda aşkar edilən kütləvi məzarlıq dünya ictimaiyyətinə bu faciənin miqyasını bir daha göstərdi. Arxeoloji və tarixi araşdırmalar nəticəsində məlum oldu ki, burada müxtəlif yaş qruplarına aid yüzlərlə insan xüsusi qəddarlıqla qətlə yetirilmişdir. Bu, insanlığa qarşı törədilmiş ağır cinayətin danılmaz sübutudur.
Uzun illər bu hadisələrə obyektiv qiymət verilməmiş, həqiqətlər gizli saxlanılmışdır. Lakin müstəqillik əldə edildikdən sonra bu məsələyə dövlət səviyyəsində xüsusi diqqət yetirilməyə başlanmışdır. Ümummilli lider Heydər Əliyev 1998-ci il 26 mart tarixli fərmanı ilə 31 mart gününü “Azərbaycanlıların Soyqırımı Günü” elan etmişdir. Bu mühüm qərar tariximizin bu ağrılı səhifəsinin araşdırılması və beynəlxalq ictimaiyyətə çatdırılması istiqamətində atılan böyük addım olmuşdur.
Bu gün Azərbaycan dövləti soyqırımı həqiqətlərinin dünya miqyasında tanıdılması üçün ardıcıl siyasət aparır. Tarixi faktlar sənədlərlə, elmi araşdırmalarla sübut olunur, müxtəlif dillərdə kitablar nəşr edilir, beynəlxalq konfranslar keçirilir. Məqsəd odur ki, dünya bu faciədən xəbərdar olsun və belə hadisələrin bir daha təkrarlanmasına yol verilməsin.
31 mart hadisələri bizə bir daha xatırladır ki, tariximizi unutmaq olmaz. Unudulan tarix təkrar olunur. Bu baxımdan, gənc nəsil öz keçmişini dərindən öyrənməli, milli yaddaşını qorumalı və bu həqiqətləri gələcək nəsillərə ötürməlidir. Hər bir azərbaycanlı bu günün məsuliyyətini dərk etməli, şəhidlərimizin xatirəsini daim uca tutmalıdır.
Bu faciə eyni zamanda xalqımızın sarsılmaz iradəsinin, birlik və həmrəyliyinin də göstəricisidir. Bütün çətinliklərə baxmayaraq, Azərbaycan xalqı öz varlığını qoruyub saxlamış, mübarizə aparmış və bu gün müstəqil dövlət kimi inkişaf etməkdədir.
31 mart – təkcə hüzn günü deyil, həm də yaddaş, ibrət və birlik günüdür. Bu gün biz həm itirdiklərimizi yad edir, həm də gələcək üçün daha güclü olmağın vacibliyini anlayırıq.
Allah bütün soyqırımı qurbanlarına rəhmət eləsin. Onların xatirəsi hər zaman qəlbimizdə yaşayacaq və heç vaxt unudulmayacaq.
AMİDTV.AZ
Allahverən Pərvizoğlu
İctimai fəal, III dəfə respublika mahnı müsabiqəsi laureatı, gənc xanəndə, AMİDTV.AZ saytının “Xüsusi müxbiri”
